ජනාධිපති රනිල් තේ වතු හිමිකරුවන්ගේ සමුළුවකදී කියා ඇත්තේ චීනය සහ ඉන්දියාවේ ප්රශ්න නිසා අයි.එම්.එෆ්. ගනුදෙනුව සාර්ථක කරගැනීම කල් යන බවය. චීනය මුල සිටම ලංකාව අයි.එම්.එෆ්. එකට යෑම ගැන කැමැති වූයේ නැත. නමුත් ලංකාවට අයි.එම්.එෆ්. යෑමට උදව් කළේ ඉන්දියාවය. 2022 අප්රේල් 20 ලංකාවේ මුදල් ඇමැති අලි සබි්ර, මහබැංකු අධිපති නන්දලාල් වීරසිංහ ඇතුළු නියෝජිත පිරිස අයි.එම්.එෆ්. ගිය වෙලාවේ ඉන්දියාවේ මුදල් ඇමැති නිර්මලාද අයි.එම්.එෆ්. රැස්වීමකට සහභාගි වීමට පැමිණ සිටියාය. එහිදී ඇය අයි.එම්.එෆ්. කළමනාකරණ අධ්යක්ෂ හමුවී ලංකාවට උදව් කරන ලෙස ඉල්ලා සිටියාය.
ලංකාවේ මුදල් ඇමැති අයි.එම්.එෆ්. යෑමට පෙර ඉන්දියාවේ ශ්රී ලංකා මහකොමසාරිස් මිලින්ද මොරගොඩ ඉන්දීය මුදල් ඇමැතිනිය හමුවී අයි.එම්.එෆ්. රැස්වීමේදී ලංකාවට උදව් කරන ලෙස ඉල්ලා සිටියේය. මුදල් ඇමැතිනිය අයි.එම්.එෆ්. ගොස් ලංකාවට උදව් කරන ලස ඉල්ලා සිටියාය. ඉන්දියාව එම ඉල්ලීම කළේ සීමාව ඉක්මවා ලංකාවට උදව් කිරීමේ අරමුණෙනි. සාමාන්යයෙන් තවත් රටක් අයි.එම්.එෆ්. එකේදී වෙනත් රටකට උදව් කරන්න කියා ඉල්ලන්නේ නැත. එලෙස අයි.එම්.එෆ්. එකේදී ලංකාවට උදව් කරන්න ඉදිරිපත් වූ ඉන්දියාව නිසා අයි.එම්.එෆ්. ඩීල් එක පරක්කු වෙනවා යැයි රනිල් කියන්නේ ඇයිද යන්න ප්රශ්නයකි.
රනිල් චීනය සම්බන්ධයෙන් එවැනි ප්රකාශයක් කරනවා නම් එහි වරදක් නැත. ඒත් අයි.එම්.එෆ්. එකට යන්න ලංකාවට උදව් කරපු ඉන්දියාවට රනිල් එලෙස චෝදනා කිරීම පුදුමය දනවයි. මෙයින් පැහැදිලි වන්නේ ගෝඨාභයගේ ආණ්ඩුව කාලයේ ඉන්දියාව සහ ලංකාව අතර තිබූ සම්බන්ධය රනිල් අවුල් කරගෙන ඇති බවය.
රනිල් මේ කතාව කරන්න පෙර ඔහුගේ උපදේශක සාගල රත්නායකව ඉන්දියාවට යැව්වේය. ලෝක බැංකුව සහ අයි.එම්.එෆ්. නිලධාරීන් හමුවීමට ලංකාවේ නියෝජිතයන් ගිය විට ඔවුන් අසන්නේ ලංකාවේ ණය ප්රතිව්යුහගත කිරීම සම්බන්ධයෙන් ඉන්දියාවේ ස්ථාවරය කුමක්ද කියාය.
වරක් නිල නොවන සාකච්ඡාවලදී ලෝක බැංකු ප්රධානියෙක් ඇසුවේ ලංකාවේ නව ජනාධිපති රනිල් තවම ඉන්දියාවේ සංචාරය නොකළේ ඇයිද යන්නය. රනිල් ජනාධිපති වූ පසු තවම ඉන්දියාවේ අගමැති, මුදල් ඇමැති හෝ විදේශ ඇමැති සමග කිසිදු නිල සාකච්ඡාවක් කර නැත. රැජිනගේ අවමඟුලේදී ඉන්දීය අගමැති මෝදි හමුවූයේ සුහද කතාබහකට පමණි.
රනිල් ඉන්දියාව සමග ගනුදෙනු කරන්න උත්සාහ ගත්තේ චීන කාඩ් එක පෙන්වලාය. මේ රනිල් සිය මාමා වන ජේ.ආර්.ගේ මකියාවෙල්ලි පොතෙන් උගත් පාඩමකි. ජේ.ආර්.ගේ කාලයේ ලංකාවේ සිටිය ඉන්දීය මහකොමසාරිස් ජේ.එන්. ඩික්සිත් සිය Assignment Colombo පොතෙහි මේ ගැන සිදුවීමක් ලියා තිබේ.
ඩික්සිත් ලියා ඇත්තේ ජේ.ආර්.ගේ ආණ්ඩුවේ අධ්යාපන ඇමැති රනිල් වික්රමසිංහ බියගම නිදහස් වෙළෙඳ කලාපය විවෘත කිරීමේ උත්සවයට ඔහුටත් ආරාධනා කොට තිබූ බවය. ජනාධිපති ජේ.ආර්. ද සහභාගි වූ උත්සවයට පැමිණ සිටි විදේශ නියෝජිතයන් කිහිප දෙනෙක් දැක තමන් පුදුමයට පත්වූ බව ඩික්සිත් සඳහන් කර ඇත.
පසුව ජේ.ආර්. එම නියෝජිතයන්ව ඩික්සිත්ට හඳුන්වා දෙමින් කියා ඇත්තේ ඔවුන් ඊශ්රායල මොසාඩ් රහස් ඔත්තු සේවයේ නිලධාරීන් බවත්, තමන් ඔවුන්ගෙන් උපදෙස් ගන්නා බවත්, එයට ඉන්දියාව බියවිය යුතු නැති බවත්ය.
ඩික්සිත් කියන්නේ මෙම උත්සවයට ඩික්සිත්ට සහ ඔවුන්ට ආරාධනා කිරීම ජේ.ආර්.ගේ උපක්රමයක් බවය. මේ උපක්රමය ක්රියාත්මක කළ ජේ.ආර්.ගේ බෑණා රනිල් අද ජනාධිපතිය. ඔහුත් අද පාවිච්චි කරන්නේ මෙවැනි උපක්රමය.
සාගලව ඉන්දියාවට යැවීමට පෙර රනිල් ඔහුගේ මාමාගේ ‘ඩේලි මිරර්’ පත්තරේ නිවුස් එකක් ප්ලාන්ට් කළේය. එනම් රනිල් චීනයට යන බවත්, චීනයේ ලංකා තානාපති ඒ සඳහා අවශ්ය පහසුකම් හදන බවත්ය.
ජේ.ආර්.ගේ උපක්රමවලින් ජේ.ආර්. පමණක් නොව රටත් විනාශ විය. මේ නිසා ඉන්දියාව සම්බන්ධයෙන් ජේ.ආර්.ගේ උපක්රම පාවිච්චි කිරීමට පෙර රනිල් දෙවරක් සිතිය යුතුය.
උපුල් ජෝෂප් ප්රනාන්දු
