අලෙවියෙන් පසු මුදල් දෙන බව පවසමින් රටේ විවිධ ප්‍රදේශවල පුද්ගලයන්ගේ රථ වාහන ලබාගෙන රුපියල් කෝටි ගණනක මුදල් වංචා කර සැඟව සිටින බව කියන මහනුවර ප්‍රධාන පෙළේ වාහන අලෙවිසල් හිමිකරුවකුගේ පුත්‍රයකු අත්අඩංගුවට ගැනීමට මහනුවර පොලිසියේ විශේෂ අපරාධ විමර්ශන ඒකකය පරීක්ෂණ ආරම්භ කොට ඇත. සැකකරු හිටපු කැබිනට් අමාත්‍යවරයකුගේ සමීප ඥාතියකු බවද විමර්ශන මඟින් හෙළිව තිබේ.
මහනුවර පොලිස් බල ප්‍රදේශයට අයත් මහයියාව ප්‍රදේශයේ කලක පටන් පවත්වාගෙන යන අදාළ වාහන අලෙවිසලේ හිමිකරු වන සැකකරුගේ පියාගෙන්ද පොලිසිය මේ පිළිබඳව ප්‍රශ්න කර ඇති අතර තම පුතු සිටින ප්‍රදේශයක් නොදන්නා බව ඔහු පොලිසියට පවසා ඇත. මහයියාව වාහන අලෙවිසලේ ගාල්කර තබා කොමිස් මුදලක් තබාගෙන වාහනය විකුණා මුදල් දෙන බව පවසමින් මෙම පුද්ගලයා දිවයිනේ පුද්ගලයන් කිහිප දෙනකුගෙන්ම වාහන ලබාගෙන තිබෙන බව පොලිස් පරීක්ෂණ මඟින් අනාවරණය වී තිබේ.
මෙලෙස ලබාගත් තම වාහනය විකිණීමෙන් ලද මුදල ලබා නොදුන් බවට පොළොන්නරුව ප්‍රදේශයේ ව්‍යාපාරිකයකු ඇතුළු ව්‍යාපාරිකයෝ කිහිපදෙනෙක් සැකකරුට එරෙහිව පැමිණිලි ඉදිරිපත් කර තිබේ. මහනුවර පොලිසියේ විශේෂ අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක උවින්දසිරි මහතාගේ උපදෙස් මත සැකකරු අත්අඩංගුවට ගැනීම සඳහා පරීක්ෂණ සිදු කෙරෙමින් පවතී.
මහනුවර – කේ.එල්. සුරවීර
