39
ලොව විවිධ රටවලට ආවේණික සාම්ප්‍රදායික ක්‍රීඩාවන් එකම තැනකට එක් කරන ලෝක නොමැඩ් ක්‍රීඩා උලෙළ (World Nomad Games) 5 වැනි වරටත් මේ වසරේ කසකස්තානයේදී පැවැත්වේ.
විවිධ රටවල ජන ක්‍රීඩාවල දැනුවත්භාවය වැඩි කිරීම, ව්‍යාප්ත කිරීමේ ක්‍රියාකාරකම්වල නියැළීම මූලික කරගත් ජාත්‍යන්තර ආයතනය වන World Ethnosport Confederation (WEC) මූලිකත්වයෙන් මේ ක්‍රීඩා උලෙළ සංවිධාන වෙයි. Ethnosport යන වචනයෙන් ප්‍රකාශ වන ජන ක්‍රීඩා සහ ඒ හා බැඳුණු සංස්කෘතීන් යළි මේ යුගලයට එක් කරමින් විශ්වීයකරණය කිරීම WEC අරමුණ වෙයි.
මේ ක්‍රීඩා උලෙළ සංවිධාන වන 5 වැනි අවස්ථාව මෙය වන අතර, 2014 වසරේ පළමු වරට මේ ක්‍රීඩා උලෙළ පැවැත්වූයේ කිරිගිස්තානයේදීය. රටවල් 19කින් තරගකරුවන් 583කගේ සහභාගිත්වයෙන් එවර ක්‍රීඩා උලෙළ ඉසව් 10කින් සමන්විත වූ අතර, දෙවැනි සහ තෙවැනි ක්‍රීඩා උලෙළ ද කිරිගිස්තානයේදී 2016 ක්‍රීඩා ඉසව් 26කින් රටවල් 62ක තරගකරුවන් 1200ක් සහ 2018දී රටවල් 82කින් තරගකරුවන් 2000ක් ඉසව් 37ක් ලෙස තරග පැවත්විණි. අවසන් වරට තුර්කියේ දී 2022 වසරේ පැවති ක්‍රීඩා උලෙළ ඉසව් 13කින් සමන්විත වූ අතර, එවර රටවල් 102ක තරගකරුවන් 3000ක් ක්‍රීඩා උලෙළ නියෝජනය කළහ.
මෙවර ක්‍රීඩා උලෙළට ද රටවල් 100කින් තරගකරුවන් 3000ක් පමණ එක්වනු ඇතැයි සංවිධායකයන්ගේ අපේක්ෂාව වී තිබේ. ක්‍රීඩා 21කින් තරග පැවැත්වෙන අතර, අශ්ව රේස්, ජාතික මල්ලවපොර, සාම්ප්‍රදායික බුද්ධිමය ක්‍රීඩා, සටන් කලාවේ තරග, සාම්ප්‍රදායික දුනු ශිල්පය, ජාතික පක්ෂීන් සමඟ දඩයම් කිරීම, අශ්ව රේසිං සහ ජන ක්‍රීඩා ඊට ඇතුළත් වේ.
එහිදී රන් පදක්කම් 97ක් පිරිනැමීමට නියමිතය.
මෙවර ක්‍රීඩා උලෙළ සඳහා ශ්‍රී ලංකාවෙන් ද කණ්ඩායමක් එක් කිරීමට බලාපොරොත්තු වන බව මේ ක්‍රීඩා උලෙළට සම්බන්ධව මෙරට නියෝජිතයා ලෙස කටයුතු කරන ශ්‍රී ලංකා ජන ක්‍රීඩා සම්මේලනයේ නිර්මාතෘ උදිත පීරිස් මහතා පවසයි.
නිරෝෂාන් ප්‍රියංකර
