ඉන්ද්රජිත් සුබසිංහ
සිය ගිණුම් සම්මත කරගනිමින් මුල්ය මෙහෙයුම් යථාවත් කරගැනීමට නොහැකිවුවහොත් ශ්රී ලංකා ක්රිකට් ආයතනය නුදුරේදී දැඩි මූල්ය අර්බුදයකට ලක්වනු ඇතැයි ශ්රී ලංකා ක්රිකට් අභ්යන්තර ආරංචිමාර්ග සඳහන් කරයි.
ක්රිකට් පරිපාලනයට පත්කර සිටින අතුරු කමිටුව නොහොත් පරිවර්තනීය කමිටුවට එහි මුදල් හැසිරවීමේ බලයක් මේ වන විට නොපවතින බැවින් ශ්රී ලංකා ක්රිකට් ආයතනයේ සාමාජිකයන් විසින් එහි ගිණුම් සම්මත කිරීම හෝ ඉදිරි නිලවරණයකින් නව පරිපාලනයක් පත්වනතුරු ජාත්යන්තර ක්රිකට් කවුන්සිලයෙන් (අයි.සී.සී) මෙරටට ප්රතිපාදන නොලැබෙනු ඇතැයි පැවසේ.
ශ්රී ලංකා ක්රිකට් ආයතනයේ මූල්ය තත්ත්වය මේ වන විට එතරම් යහපත් නොවන අතර මෙම අතුරු කමිටුව පත්වන විට ශ්රී ලංකා ක්රිකට් ආයතනය සතුව පැවැතියේ ඉදිරි මාස තුනක පැවැත්ම සඳහා වන මූල්ය ශක්තියක් පමණක් බව කියැවිණි. එම තත්ත්වය මත මෙරට ක්රිකට් මූල්ය ශක්තිය ස්ථාවර කරගැනීම අරමුණු කරගනිමින් ඉන්දියාව සමග අතිරේකව ක්රිකට් තරග 6ක් යොදාගැනීමට පැවැති පරිපාලනය කටයුතු යොදමින් සිටියද ඒ අතරතුර ඔවුනට පරිපාලනයෙන් ඉවත්ව යෑමට සිදුවීමත් සමග මේ වන විට එම අතිරේක තරගාවලියද අවිනිශ්චිත තැනකට පත්ව තිබේ.
මේ අතර වත්මන් අතුරු කමිටුවට මුදල් හැසිරවීමේ ක්රමවේදයක් නොවීම මත ශ්රී ලංකා ක්රිකට් ආයතනය වෙතින් මුදල් ලැබිය යුතු සැපයුම්කරුවන් ආදිය වෙත මේ වන විට අදාළ ගෙවීම් කටයුතු සිදු නොවන බවත් යම් ලෙසකින් එම තත්ත්වය තවදුරටත් එලෙස පැවැතියහොත් සැපයුම්කරුවන් වෙතින් ක්රිකට් ආයතනය වෙත දැඩි පීඩනයක් එල්ලවනු ඇති බවත් පැවසේ.
මේ ආදී තත්ත්වයන්ද සැලකිල්ලට ගනිමින් මෙම මස 31 වැනිදා වාර්ෂික මහ සභාව කැඳවීමට මේ වන විට කටයුතු යෙදෙමින් ඇති අතර එහිදී අදාළ ගිණුම් සම්මත කරගැනීම පරිපාලනයේ අරමුණ වනු ඇත.
