මහා භාණ්ඩාගාරයට අයත් අමෙරිකානු ඩොලර් මිලියන 2.5ක මුදලක් සයිබර් ප්රහාරයක් මගින් සොරකම් කිරීමේ සිද්ධිය සම්බන්ධයෙන් හදිසි විවාදයක් පවත්වන ලෙස විපක්ෂය කළ ඉල්ලීමත් සමඟ පාර්ලිමේන්තුවේ අද (05) දැඩි උණුසුම් තත්ත්වයක් හටගත්තේය.
විපක්ෂයේ ප්රධාන සංවිධායක ගයන්ත කරුණාතිලක මහතා සභාවට දන්වා සිටියේ, මෙම මූල්ය කොල්ලය පිළිබඳව වහාම විවාදයක් ලබාදෙන ලෙස ඉල්ලා කථානායකවරයා වෙත ලිඛිත ඉල්ලීමක් ඉදිරිපත් කර ඇති බවයි.
එම යෝජනාවෙන් අනතුරුව විපක්ෂයේ මන්ත්රීවරුන් පිරිසක් සිය අසුන්වලින් නැගී සිටිමින් රජයට බලකර සිටියේ මෙම විවාදය සඳහා වහාම ඉඩ ලබාදෙන ලෙසයි.
කථානායක ජගත් වික්රමරත්න මහතා පැහැදිලි කළේ, හදිසි විවාදයක් පැවැත්වීමට නම් ඒ පිළිබඳ යෝජනාව සභා වාරය ආරම්භ වීමට ප්රථම ඉදිරිපත් කළ යුතු බවත්, ඒ සඳහා කථානායකවරයාගේ සහ පාර්ලිමේන්තුවේ අනුමැතිය හිමිවිය යුතු බවත්ය. කථානායකවරයාගේ මෙම ප්රකාශයත් සමඟ විපක්ෂ මන්ත්රීවරුන් සහ කථානායකවරයා අතර දැඩි උණුසුම් තත්ත්වයක් ඇති විය.
සභාවේ ඇති වූ නොසන්සුන්කාරී තත්ත්වය හමුවේ සභානායක බිමල් රත්නායක මහතා මැදිහත් වෙමින් ප්රකාශ කළේ, මෙම සිද්ධිය සම්බන්ධයෙන් විවාදයක් පැවැත්වීමට රජය සූදානම් බවයි.
ඒ අනුව විපක්ෂයේ ඉල්ලීමට එකඟතාව පළ කළ සභානායකවරයා, අද පස්වරු 3.30 සිට 5.30 දක්වා කාලය තුළ එම හදිසි විවාදය පැවැත්වීමට රජය තීරණය කළ බව සභාවට නිවේදනය කළේය.
