ශ්රී ලංකාව තෙල් නිෂ්පාදනය කරන හෝ තෙල් ළිං හිමි රටක් නොවුණ ද, පවතින බෙදාහැරීමේ ජාලය බිඳවැටීමට නොදී අඛණ්ඩව ඉන්ධන සැපයුම පවත්වාගෙන යාමට රජය සමත් වී ඇති බව ජනාධිපති අනුර කුමාර දිසානායක මහතා පවසයි.
ජනාධිපතිවරයා මේ බව සඳහන් කළේ මහරගමදී පැවති ජාතික ජන බලවේගයේ මැයි දින රැළිය අමතමිනි.
ඉන්ධන සැපයුම සම්බන්ධයෙන් පවතින තත්ත්වය පැහැදිලි කළ ජනාධිපතිවරයා, ඉදිරියේදී පැමිණීමට නියමිත ඉන්ධන නැව් සඳහා අවශ්ය ඉඩකඩ සලසා ගැනීම වෙනුවෙන් පෙට්රල් කෝටාව (QR) ඉහළ නැංවීමට පියවර ගත් බව අනාවරණය කළේය.
දැනට මෙරටට ලැබී ඇති පෙට්රල් නැව් හේතුවෙන් ගබඩා පහසුකම් සීමා වී ඇති බැවින්, මීළඟ නැව පැමිණෙන විට ගබඩා යම් ප්රමාණයකට හිස්ව තිබිය යුතු නිසා මෙම තීරණය ගත් බව ඔහු පෙන්වා දුන්නේය.
ඉන්ධන මිල පිළිබඳව අදහස් දක්වමින් ජනාධිපතිවරයා කියා සිටියේ, ලෝක වෙළඳපොළේ මිල ගණන් පහත වැටෙනු ඇතැයි රජය අපේක්ෂා කළ ද එය එසේ නොවූ බවයි.
මේ හේතුවෙන් ඉදිරියේදී ඉන්ධන මිලෙහි යම් වෙනසක් හෝ උච්චාවචනයක් සිදුවිය හැකි බව ඔහු සඳහන් කළේය.
කෙසේ වෙතත්, රජයේ මූලික අවධානය යොමුව ඇත්තේ ජනතාවට අපහසුවකින් තොරව ඉන්ධන ලබාදීම කෙරෙහි බවත්, ඕනෑම අභියෝගයක් හමුවේ අඛණ්ඩ ඉන්ධන සැපයුමක් සහතික කිරීමට රජය පියවර ගන්නා බවත් ජනාධිපති අනුර කුමාර දිසානායක මහතා මෙහිදී වැඩිදුරටත් අවධාරණය කළේය.
