20
රත්නපුර නව නගර කුමර විදුහල් කණ්ඩායම: ඉදිරි පෙළ (වමේ සිට) – මධුක එදිරිසිංහ, මුදිත දමිත්, හන්සක ලෝරන්ස්, ඩිල්සර උදාන, කේ.එන්. කරුණාරත්න (නි. විදුහල්පති), මාපා මිලින්ද (සහාය පුහුණුකරු), චමින්ද සුපුන් (ප්‍රධාන පුහුණුකරු), පියසිරි පතිරගේ (විදුහල්පති), ගයාන් තිලකරත්න (ක්‍රීඩා අංශ ප්‍රධාන), නිමේෂ් වීරසිංහ (ක්‍රිකට් භාර ආචාර්ය), ඔවිඳු රාජපක්ෂ (නායක), මලීෂ තේජාන්, මොහොමඩ් මින්රාර්, මොහොමඩ් රියාස්, පසු පෙළ – සතික දම්සිත්, සිතුම් දිදුලංක, යසික දිල්ශාන්, මධුරංග ධර්මදාස, නිම්න සිහිලැල්, කහාන් දන්තුල, ගිම්හාන් ආදිත්‍ය, කෝකිල ගයන, මිහිරංග කෝසල, පසිඳු මල්ෂාන්, තිනුක රාජපක්ෂ, නිපුන් ලක්ෂිත, වරුණ කල්හාර.
රත්නපුර සාන්ත ඇලෝසියස්, නව නගර කුමර විදුහල් අතර පැවැත්වෙන වංශාධිපතිවරුන්ගේ ක්‍රිකට් සටන වාර්ෂික දෙදින ක්‍රිකට් තරගය මේ සති අන්තයේ (මාර්තු මස 1 හා 2) රත්නපුර මහජන ක්‍රීඩාංගණයේදී පැවැත්වේ.
තෙවැනි වරට සංවිධාන වන මෙවර තරගයේදී සාන්ත ඇලෝසියස් ජාතික පාසල් කණ්ඩායම තුෂිත අනුහස් විසින් ද කුමර මහා විදුහල් කණ්ඩායම ඔවිඳු රාජපක්ෂ විසින් ද මෙහෙයවනු ලබති.
මෙතෙක් පැවති තරග දෙකම ජය පරාජයෙන් තොරව නිමා වූ හෙයින් මෙවර තරගය ජය ගනිමින් මංගල ශූරතාව හිමි කර ගැනීමට දෙපිලම පූර්ණ සූදානමකින් පසු වෙයි. කණ්ඩායම් ද්විත්වයේම දක්ෂ ක්‍රීඩකයන් සිටින බැවින් ඔවුන් සිය උපරිම දක්ෂතා අතරට පැමිණීමට සූදානම් බවත් එම නිසා තියුණු තරගයක් දැක ගැනීමට අවස්ථාව හිමි වන බවත් කණ්ඩායම් ද්විත්වයේ පුහුණුකරුවන් මෙන්ම නායකයන් දෙපළ ද කියා සිටියහ.
තරගය සම්බන්ධයෙන් දැනුම්වත් කිරීමේ මාධ්‍ය හමුවක් පසුගියදා රත්නපුර කේතුමතී උත්සව ශාලාවේදී පැවති අතර එහිදී රත්නපුර නව නගර කුමර විදුහලේ විදුහල්පති පියසිරි පතිරගේ මහතා පැවසුවේ මේ පාසල් ද්විත්වයේම අති දක්ෂ ක්‍රීඩකයන් කිහිපදෙනකු සිටින බැවින් ඔවුන්ගෙන් එක් අයකු හෝ ඉදිරියේදී ජාතික ක්‍රිකට් කණ්ඩායමේ ක්‍රීඩා කරනු දැකීම සැමගේ එකම ප්‍රාර්ථනය බවයි. මේ ක්‍රිකට් තරගය රත්නපුරේ පැවැත්වෙන ප්‍රධානතම ක්‍රිකට් තරගය බැවින් එය දිවයිනේ අන් සියලු පාසල්වලට හා ක්‍රීඩකයන්ට ආදර්ශයක් වන ලෙස පැවැත්වීමට සියලු දෙනාගේ සහයෝගය අත්‍යවශ්‍ය බව ද විදුහල්පතිවරයා කියා සිටියේය.
රත්නපුර දිස්ත්‍රික්කයේ ඇති ප්‍රධාන පිරිමි පාසල් දෙක මේ පාසල් දෙක බැවින් තරගය නැරඹීමට විශාල පිරිසක් සහභාගී වීමට නියමිත බවත්, සියලු සිසුන් මේ දක්වා පවත්වාගෙන ආ පාසල් ද්විත්වයේ විනය ආරක්ෂා වන පරිදි ක්‍රියා කළ යුතු බවත් රත්නපුර සාන්ත ඇලෝසියස් ජාතික පාසලේ විදුහල්පති ඩී. එම්. මද්දුම බණ්ඩාර මහතා මෙහිදී පැවසීය.
කුරුවිට – කේ.ඒ. සුනිල්
