20
පැරිස් ඔලිම්පික් ක්‍රීඩා උලෙළේ ආරක්ෂක විධිවිධාන අඩංගු ලියකියවිලි සහිත බෑගයක් ‘ගෙයා ඩූ නෝර්ඩ්’ දුම්රිය ස්ථානයේදී සොරා ගැනීමත් සමඟ එළඹෙන ඔලිම්පික් ආරක්ෂක සැලසුම් සැලකිය යුතු පසුබෑමකට ලක්ව ඇතැයි වාර්තා වේ. පැරිස් නගර ශාලාවේ ඉංජිනේරුවකු ඔලිම්පික් ආරක්ෂක විධිවිධාන අඩංගු තම පරිගණකය සහ දත්ත ගබඩා කිරීමේ උපාංග 2ක් (USB flash drive) සමඟ පෙරේදා (27) දින දුම්රියෙන් ගමන් කිරීම්දී මේ සොරකම සිදුව තිබේ.
පැරිස් පොලිසිය වහාම සොරකම් කරන ලද පරිගණකය සහ දත්ත ගබඩා කිරීමේ උපාංග සොයා ගැනීමටත්, ඔලිම්පික් උලෙළේ ආරක්ෂක රාමුවට සිදු විය හැකි හානිය අවම කිරීමටත් පරීක්ෂණයක් ආරම්භ කොට ඇතැයි විදෙස් මාධ්‍ය සඳහන් කළේය. ආරක්ෂක අංශ නිලධාරීන් එම ස්ථානයේ තිබූ සීසීටීවී දර්ශන පරීක්‍ෂා කරමින් අපරාධකරුවන් සොයා ගැනීමට කටයුතු කොට ඇති අතර, හඳුනාගත් සාක්ෂිකරුවන්ගෙන් ප්‍රකාශ සටහන් කරගනිමින් සිටී.
ඔලිම්පික් ක්‍රීඩා උලෙළේ සංවිධාන කටයුතු සැලසුම් කිරීමේ එක් කොටසක් භාරව සිටි ඉංජිනේරුවරයා, දුම්රියට නැඟ ඔහුගේ ආසනයට ඉහළින් ඇති ගමන් මලු තබන රාක්කයේ පරිගණකය සහිත බෑගය තබා ඇත. දුම්රිය ප්‍රමාද වන බව දැනගත් පසු වෙනත් දුම්රියකට මාරුවීමට සූදානම් වෙද්දී බෑගය අතුරුදන්ව තිබූ බව ඉංජිනේරුවරයා පොලිසියට පවසා තිබේ. පැරිස් නගර ශාලාවේ ඔලිම්පික් උලෙළ සඳහා වන ආරක්ෂක සැලසුම් පරිගණකයේ තිබූ බවත්, පොලිස් නිලධාරීන් 2,000ක් පමණ නගර ශාලාවේ රාජකාරිවලට යොදවා ගන්නා අයුරු ඇතුළත් ආරක්ෂක විධිවිධාන එහි අඩංගුව තිබූ බවත් ඔහු පොලිසියට පවසා තිබේ.
ලබන ජුලි 26 වෙනිදා ආරම්භ වන 2024 ඔලිම්පික් උලෙළ වෙනුවෙන් ප්‍රංශ බලධාරීන් පුළුල් ආරක්ෂක සැලැස්මක් නිර්මාණය කොට ඇති අතර, ඒ වෙනුවෙන් ප්‍රංශ රජය, අමෙරිකානු ඩොලර් මිලියන 350ක් වෙන් කරන ලදී. සමාරම්භක දිනයේ අගනුවරට රැස්වන ප්‍රේක්ෂකයන්ගේ ආරක්ෂාව වෙනුවෙන් ආරක්ෂක නිලධාරීන් 45,000ක් පමණ යෙදවීමට නියමිත අතර ඉන් අනතුරුව අගෝස්තු 11 වැනිදා දක්වා පැවැත්වෙන තරගාවලිය වෙනුවෙන් ආරක්ෂක නිලධාරීන් 35,000ක් යෙදවීමට අපේක්ෂා කෙරේ.
ප්රින්ස් ගුණසේකර
