අද දින (07) පෙරවරුවේ වෙල්ත්ට්රස්ට් සිකියුරිටීස් ලිමිටඩ් (Wealthtrust Securities Limited) ආයතනය විසින් සිදු කරන ලද ඇතැම් ගනුදෙනු අසාමාන්ය මිල ගණන් යටතේ සිදුවී ඇති බව නිරීක්ෂණය වීම හේතුවෙන්, කොළඹ කොටස් වෙළඳපොළේ කටයුතු තාවකාලිකව අත්හිටුවීමට පියවර ගෙන ඇත.
මෙම අසාමාන්ය මිල ගණන් ආයෝජකයින්ගේ මිලදී ගැනීමේ හැකියාව කෙරෙහි සෘජු බලපෑමක් ඇති කළ හැකි බැවින්, වෙළඳපොළේ සාධාරණත්වය සහ විනිවිදභාවය ආරක්ෂා කිරීම වෙනුවෙන් මෙම පියවර ගත් බව කොළඹ කොටස් වෙළඳපොළ නිවේදනය කරයි.
සුරැකුම්පත් හා විනිමය කොමිෂන් සභාවේ එකඟතාවය ඇතිව, අද දින වෙළඳපොළ කටයුතු අත්හිටුවීමට පෙර සිදු කරන ලද සියලුම කොටස් ගනුදෙනු අවලංගු කිරීමට තීරණය කර ඇත.
ඉහත සඳහන් කළ සියලුම ගනුදෙනු අවලංගු කිරීමෙන් අනතුරුව සහ අද දින පෙරවරු 9:00 න් පසු පද්ධතියට ඇතුළත් කරන ලද සියලුම ඇණවුම් ඉවත් කිරීමෙන් පසු වෙළඳාම් කටයුතු යළි ආරම්භ කිරීමට නියමිතය.
පද්ධතියේ තිබූ ඇණවුම් ඉවත් කර ඇති බැවින්, ගනුදෙනුකරුවන් විසින් තම ඇණවුම් නැවත වරක් ඇණවුම් කළමනාකරණ පද්ධතියට (Order Management System – OMS) ඇතුළත් කළ යුතු බව කොටස් වෙළඳපොළ බලධාරීන් දැනුම් දෙයි.
