21
ප්‍රංශයේ පැරිස් නුවර පැවති පැරාලිම්පික් ක්‍රීඩා තරගාවලියේදී නව ලෝක වාර්තාවක් තබමින්, රිදී පදක්කම දිනා ගත් සමිත දුලාන් ක්‍රීඩකයා පෙරේදා කටුනායක ගුවන්තොටුපොළ වෙත පැමිණියේය.
සමිත එෆ්. 44 කාණ්ඩය යටතේ හෙල්ල විසි කිරීමේ ඉසව්වට සහභාගි වී මේ ජයග්‍රහණය හිමි කර ගෙන තිබූ අතර, ඔහු මීට පෙර ජපානයේ ටෝකියෝ නුවර පැවති පැරා ඔලිම්පික් තරගාවලියට ද සහභාගි වී ලෝකඩ පදක්කමක් දිනා ගැනීමට සමත් වී තිබිණි.
සමිත දුලාන් පිළිගැනීම ක්‍රීඩා අධ්‍යක්ෂ ජනරාල් මහාචාර්ය රියර් අද්මිරාල් ෂෙමාල් ප්‍රනාන්දු මහතාගේ ඉල්ලීම පරිදි ඔහුගේ ආදරණීය බිරිය, දරුවා, ඔහුගේ පියා හා මවගේ ප්‍රධානත්වයෙන් සිදු කිරීම විශේෂත්වයක් විය.
වෙනදා මෙවැනි ජයග්‍රහණයකදී නිලධාරීන් ඉදිරියට පැමිණීම දක්නට ලැබුණද සිය පවුලේ අය විසින් මල්මාලා දමා සමිත පිළිගැනීම පිළිබඳ බොහෝ දෙනකුගේ ප්‍රශංසාව හිමි විය. ක්‍රීඩා අධ්‍යක්ෂ ජනරාල්වරයාට අමතරව ජාතික පැරා ඔලිම්පික් කමිටුවේ සභාපති දීපාල් පෙරේරා මහතා ඇතුළු නිලධාරීන් පිරිසක් හා ශ්‍රී ලංකා යුද හමුදාවේ ක්‍රීඩා අංශයේ නිලධාරීහු පිරිසක් ද කටුනායක ගුවන්තොටුපොළ වෙත පැමිණ සිටියහ.
කටුනායක – ටී.කේ.ජී.කපිල
