22
පිලිපීනයේ මැනිලා අගනුවර කේන්ද්ර කරගත් චීන මාධ්යවේදියකු එරට ඔත්තුකරුවෙක් බවට සැක කරන බවට එරට ජාතික ආරක්ෂක කවුන්සිලයේ සහකාර අධ්යක්ෂ ජනරාල් ජොනතන් මලයා ප්රකාශ කර ඇතැයි විදෙස් මාධ්ය වාර්තා කළේය. ඒ පිළිබඳ විමර්ශනය කරමින් සිටින බවත්, රහසිගත මෙහෙයුම් සඳහා සිය රට ඉලක්ක කරමින් ඔහු කටයුතු කරන බවට තොරතුරු ලැබී ඇති බවත් පිලිපීනයේ ජාතික ආරක්ෂක කවුන්සිලයේ සහකාර ප්රධානියා වැඩිදුරටත් සඳහන් කර ඇතැයි වාර්තා වේ.
වසර 2021 සිට මේ වසර දක්වා වෙනිහුයි ඩේලි පුවත්පතේ මැනිලා කාර්යාංශයේ ප්රධානියා ලෙස කටයුතු කර ඇති සැං ස්ටීව් සොං නමැති එම මාධ්යවේදියා පිළිබඳ කරුණු එක්රැස් කිරීමෙන් පසු ඔහු චීනයේ ආරක්ෂක අමාත්යාංශයේ නියෝජිතයකු බවට පිලිපීනයේ බුද්ධි අංශ තහවුරු කර ඇති බවත් ඔහු ප්රකාශ කර ඇතැයි විදෙස් මාධ්ය සඳහන් කළේය.
ඔහු පිලිපීනයේ මාධ්ය ක්ෂේත්රයේ රැකියාවේ නිරතව සිටින විදේශීය මාධ්යවේදීන්ගේ අනන්යතාව අධීක්ෂණය කරන රජයේ ඒජන්සිය වන ජාත්යන්තර මාධ්ය මධ්යස්ථානයේ ද ලියාපදිංචි පුද්ගලයකු නොවන බව එරට රැප්ලර් පුවත් සේවය වාර්තා කළේය. මේ වන විට පිලිපීන රජය ඔහුට එරෙහිව නීතිමය වශයෙන් කටයුතු කිරීමේ හැකියාව පිළිබඳ සොයා බලමින් සිටින බවත් වැඩිදුරටත් වාර්තා වේ.
