24
ලබන වසරේ සිට වෛද්‍ය විද්‍යාල සඳහා බඳවා ගන්නා සිසුන් සංඛ්‍යාව දෙදහසකින් වැඩි කිරීමට රජය ගත් තීරණයට එරෙහිව දකුණු කොරියාවේ කනිෂ්ඨ වෛද්‍යවරුන් සේවයෙන් ඉවත්වීම සහ වැඩ වර්ජනය අතරතුර රෝගී කාන්තාවක් මිය යෑම සම්බන්ධව එරට රජය විමර්ශනයක් ආරම්භ කර ඇතැයි විදෙස් මාධ්‍ය වාර්තා කළේය.
වෛද්‍යවරුන්ගේ ගැටලුව හේතුවෙන් රෝගී කාන්තාව රැගත් ගිලන් රථයට ඇතුළුවීමට එරට රෝහල් කිහිපයක් අවසර නොදුන් බවත්, වයස අසූගණන්වල පසුවන එම කාන්තාවගේ රෝගී තත්ත්වය අසාධ්‍ය වීමෙන් ජීවිතක්ෂයට පත් වී ඇතැයි මූලික විමර්ශනයේදී අනාවරණය වූ බව ද වාර්තා වේ.
කනිෂ්ඨ වෛද්‍යවරු 9,000කට ආසන්න සංඛ්‍යාවක් සේවයෙන් ඉවත්වීම හෝ වැඩ වර්ජනයේ නිරත වීම නිසා එරට ගැබිනි මවුවරුන්ගේ සීසේරියන් සැත්කම් අවලංගු කිරීමටත්, පිළිකා රෝගීන්ගේ ප්‍රතිකාර කල් දැමීමටත් රෝහල් බලධාරීන්ට සිදු වී තිබූ අතර, එරට පුහුණු වෛද්‍යවරුන්ගෙන් 71%ක් මේ වනවිට සේවයෙන් ඉවත්ව සිටීමෙන් තත්ත්වය බරපතළ වී ඇතැයි වාර්තා වේ.
